АОКАда 7 апрель куни ўтказилган брифингда «Ўзтўқимачиликсаноат» уюшмаси ахборот хизмати раҳбари Шаҳзода Қўчқорова Ўзбекистонга 300 дан ортиқ халқаро брендларнинг қизиқиши ортиши кутилаётганини ва бир қатор йирик брендлар билан музокаралар ўтказилишини маълум қилди. Бу ҳақда «Bugun.uz» мухбири хабар берди.

Қайд этилишича, 2022 йилнинг март ойида «Cotton Campaign» халқаро коалицияси томонидан 12 йил давом этган ўзбек пахтаси ва ундан ишлаб чиқарилган тайер маҳсулотларга эълон қилинган бойкот бекор қилинганди. Бу 331 та халқаро бренднинг Ўзбекистонга қизиқиши ортишига ва хорижий инвесторларнинг оқимини кучайишига олиб келиши кутилмоқда.

«Давлат раҳбари раислигида 31 март куни ўтказилган селектор йиғилишида берилган вазифаларни амалга ошириш мақсадида хорижий давлатларга чиқиш ва ўзбек тўқимачилик маҳсулотларини глобал ишлаб чиқариш занжирига қўшиш юзасидан йўл харитаси ишлаб чиқилди.

Апрель ойида Германия, Испания, Корея, Хитой, Бангладеш каби давлатларга Бизнес делегациялар юборилиши кутилмоқда. Унда ‘H&M’, ‘Zara’ (Inditex), ‘C&A’, ‘Falke’ каби йирик брендлар билан музокаралар ўтказиш белгиланган», — деди Шаҳзода Қўчқорова.

Унинг сўзларига кўра, 2022 йил январь–март ойларида 7 та халқаро кўргазмада уюшма бошчилигида 75 дан зиёд корхона иштирок этган. Хусусан, илк бор ўзбек тўқимачилик маҳсулотлари Япония, Марокаш ва Миср каби давлатларда ягона «Made in Uzbekistan» стенди билан намойиш этилган.

Эслатиб ўтамиз, аввалроқ Ўзбекистон 2021 йилнинг 1-чорагида қанча тўқимачилик маҳсулоти экспорт қилгани маълум бўлганди.