Шавкат Мирзиёев Олмазор туманидаги 102-сонли эшитиши заиф болалар учун мўлжалланган мактаб-интернатга боргани ҳақида хабар берилганди. Давлат раҳбари у ерда ўтказаётган видеоселектор йиғилишида меҳрибонлик уйлари ҳақида гапирди.

Маълум қилинишича, мамлакатда охирги ярим йилда Меҳрибонлик уйлари, Болалар шаҳарчаси ва SOS болалар маҳаллалари уюшмаси қарамоғидаги 1619 нафар бола ўз оиласи ва яқин қариндошлари тарбиясига ўтказилган.

Натижада 10 та Меҳрибонлик уйи, 3 та Болалар шаҳарчаси ва 2 та Болалар уйи эҳтиёж қолмагани учун ёпилган. Қолган 6 та Меҳрибонлик ва 11 та кичик Болалар уйларида 1475 та ўрин мавжуд бўлиб, бугунги кунда уларда 897 та етим бола бор.

«Албатта, болалар уйлари ва улардаги етимлар сони камайгани, халқимизнинг юксак маънавияти, иймон-инсофи ва болажонлигини кўрсатиб турибди. Лекин мамлакатимизда умуман етимлар бўлмаса, янада яхши бўлар эди. Шунинг учун имкон қадар уларни муносиб оилаларга фарзандликка беришни тезлаштириш чораларини кўриш лозим», — деди Президент.