Шавкат Мирзиёев 8 апрель куни Қирғизистон президенти Садир Жапаров билан телефон орқали мулоқот қилди. Бу ҳақда Президент матбуот хизмати хабар берди.

Давлат раҳбарлари Рамазон ойи бошлангани билан бир-бирини самимий табриклаб, Ўзбекистон ва Қирғизистон халқларига тинчлик-осойишталик, фаровонлик ва равнақ тилади.

Мамлакатлар ўртасидаги дўстлик, қўшничилик ва стратегик шериклик муносабатларини янада мустаҳкамлаш, амалий ҳамкорликни кенгайтириш бўйича аввал эришилган келишувлар амалга оширилишининг бориши муҳокама қилинди. Ўзбекистон–Қирғизистон тараққиёт жамғармаси фаолиятини бошлаш, Қамбарота 1-гидроэлектр станцияси ва Хитой–Қирғизистон–Ўзбекистон темир йўлини қуриш бўйича лойиҳаларни жадаллаштириш, саноат кооперациясини кенгайтиришга алоҳида эътибор қаратилди.

Шунингдек, маданий-гуманитар соҳадаги алмашинувлар ва қўшма дастурлар амалга оширилаётгани катта мамнуният билан қайд этилди. Қабул қилинган қарорларни сўзсиз бажариш мақсадида ҳукуматлар даражасида фаол мулоқотларни давом эттиришга келишиб олинди.

Давлат раҳбарлари бўлажак олий даражадаги учрашувлар режасини кўриб чиқдилар. Минтақавий кун тартибининг долзарб масалалари юзасидан фикр алмашилди.

Аввалроқ Президент Имрон Хон билан телефон орқали мулоқотда парламент сайлови муваффақиятли ўтишини тилаганди.