Қирғизистонда жиноий гуруҳ аъзолари ўзбекистонлик эркакни уриб, ундан пул талаб қилди — видео
Улар жабрланувчининг ноутбук ва телефонини тортиб олган
Қирғизистоннинг Жалолобод шаҳрида уюшган жиноий гуруҳ аъзолари ўзбекистонлик эркакни уриб, ундан пул талаб қилди. Бу ҳақда «24.kg» хабар берди.
Келтирилишича, 31 март куни соат тахминан 03:00 да (Бишкек вақти билан) номаълум шахслар шаҳарда вақтинча яшовчи 49 ёшли ўзбекистонлик эркакнинг уйига келиб, уни қўрқитиб, ноутбук ва телефонини тортиб олган. Кейин эркакни далага олиб чиқиб, урган. Шундан сўнг жиноий гуруҳ жабрланувчини уйига қайтариб, ундан 50 минг сом (6 миллион 127 минг сўм) талаб қилган.
Ҳолат юзасидан Ички ишлар вазирлигида рўйхатда турган 26 ёшли йигит ва унинг Сузоқ туманида яшовчи 25 ёшли шериги гумонланувчи сифатида қўлга олинган.
Аввалроқ Қирғизистонда 20 ёшли ўзбекистонлик йигит пули йўқлиги учун бўғиб ўлдирилганди. Шунингдек, мамлактда аэропортдан қарийб 2 килограмм олтин олиб ўтмоқчи бўлган ўзбекистонликлар қўлга олинган.
