Хоразмда маҳаллий овчилар ноёб тур бўлган Амударё катта куракбурун балиқларини тутиб сотаётгани айтилмоқда. Бу ҳақда «Ekologuz» Telegram каналида хабар берилди.

Маълум қилинишича, «Бола кўрмаётган аёл еса, фарзандли бўлармиш», деган илмий асоссиз гаплар туфайли вилоятда маҳаллий овчилар томонидан бу тур балиқлар кўплаб тутиб сотилмоқда.

Қайд этилишича, эколог Фазлулло Аъзамов, биолог-ихтиолог Бахтиёр Шералиев, Ўзбекистон миллий университети магистранти Акбар Рўзимовлар «Дунё бўйлаб» телеканали билан ҳамкорликда ушбу ҳолат юзасидан лавҳа тайёрлаган.

Таъкидланишича, Амударё катта куракбурунини овлаш тақиқланган бўлиб, улар Қизилқум, Сурхон қўриқхоналарида ва Қуйи Амударё биосфера резерватининг қўриқланадиган ҳудудида муҳофаза қилинади.

Аввалроқ Наманган вилояти Чуст туманида жойлашган Варзик сув омборида балиқлар номалум сабабга кўра нобуд бўлгани ҳақида хабар берилганди. Шунингдек, Жиззахда 300 бош қўй олиб кетилаётган юк машинаси ағдарилиб, бир қанча зотдор қўй нобуд бўлгани ҳақида маълум қилинганди.