Тошкент шаҳар ҳокими Жаҳонгир Ортиқхўжаев 11 апрель куни реконструкция қилинган Космонавтлар майдонига ташриф буюриб, аҳоли билан суҳбатлашди. Бу ҳақда «NOVA24» хабар берди.

Маълум қилинишича, ҳокимлик 13 февраль бошлаб ҳудудни реконструкция қилишга киришган. Орадан бироз вақт ўтиб майдонга Тошкент шаҳар ҳокими келиб, реконструкция лойиҳаси ҳақида гапирар экан, бу борадаги ишлар шаҳар буджети ҳисобидан эмас, балки AKFA ҳисобидан амалга оширилаётганини айтган.

Пойтахт ҳокими 11 апрель куни реконструкция ишлари якунланган майдонга ташриф буюрган ва нима сабабдан объектда ишлар тугаллангач, тантанали очилиш маросими бўлмаганини маълум қилган.

Унинг сўзларига кўра, реконструкция қилинган майдон ишга тушса, бир зумда «тешик, тирналган жой қидира бошлайдиган» одамлар келади.

«Бу одамлар учун кашфиёт», — деган Ортиқхўжаев, шунингдек, кечаю кундуз фуқароларни қандай қабул қилиши ҳақида маълумот берган.

Маълумот ўрнида, Тошкент шаҳрида жойлашган Космонавтлар майдонини рухсатсиз реконструкция қилиш бошлангани кўплаб баҳс-мунозарага сабаб бўлганди. Ушбу «Коинот» мажмуаси 1984 йилда очилган ва монументал санъат ёдгорликлари рўйхатига киритилган. Қонун ҳужжатларига мувофиқ, маданий ва моддий мерос объектларида қурилиш, таъмирлаш ва реставрация ишларини фақат Маданий мерос агентлиги ҳузуридаги Илмий-эксперт кенгаши тасдиқлагандан сўнг амалга оширишга рухсат берилади.