Финляндиянинг Ўзбекистондаги янги элчиси тайинланди
У ушбу лавозимга тайинлангунга қадар ТИВ департаменти бош директори маслаҳатчиси бўлиб ишлаган
Дипломат Илкка Ряйсянен Финляндиянинг Ўзбекистондаги янги элчиси этиб тайинланди. Бу ҳақда «Дунё» ахборот агентлиги хабар берди.
Маълум қилинишича, Ташқи ишлар вазирлигида Финляндиянинг Ўзбекистондаги элчиси этиб тайинланган Илкка Ряйсянен билан видеоконференсалоқа орқали учрашув бўлиб ўтган.
Мулоқот чоғида элчининг ишонч ёрлиқларини топшириш учун Тошкентга ташрифини ташкил этиш, Ўзбекистон вазирлик ва идораларида икки томонлама учрашувлар ўтказишнинг амалий жиҳатлари, шунингдек, Ўзбекистон–Финляндия ҳамкорлигини янада ҳар томонлама кенгайтириш бўйича аниқ қадамлар муҳокама қилинган.
Икки томонлама сиёсий маслаҳатлашувларнинг навбатдаги раундини ҳамда Савдо-иқтисодий ва илмий-техникавий ҳамкорлик бўйича ҳукуматлараро комиссиянинг учрашувини 2022 йилда Тошкент шаҳрида ўтказиш, шунингдек, Финляндия делегациясининг 2022 йил август ойида Ўзбекистонга ташрифини биргаликда ўрганиш бўйича келишувга эришилган.
Илкка Ряйсянен элчи лавозимига тайинлангунга қадар Финляндия Ташқи ишлар вазирлиги департаменти бош директори маслаҳатчиси лавозимида ишлаган. У 61 ёшда бўлиб, 2018–2021 йилларда Финляндиянинг Ўзбекистондаги дипломатик миссиясини бошқарган.
Аввалроқ Финляндиянинг Ўзбекистондаги фавқулодда ва мухтор элчиси Маря Лиивала мамлакатдаги дипломатик миссиясини якунлагани хабар берилганди. Шунингдек, Тожикистоннинг Ўзбекистондаги фавқулодда ва мухтор элчиси тайинлангани маълум қилинганди. Ҳамда Руминиянинг Ўзбекистондаги элчиси тайинланганди.
