Зеленский «Путиннинг қадрдони» Виктор Медведчук ҳибсга олинганини маълум қилди
У махсус операция давомида ушланган
Украиналик сиёсатчи Виктор Медведчук ҳуқуқ-тартибот идоралари томонидан ҳибсга олинди. Бу ҳақда Украина президенти Владимир Зеленский ўзининг Telegram каналида маълум қилди.
Украинанинг «Мухолифат платформаси — Ҳаёт учун» партияси сиёсий кенгаши раҳбари Виктор Медведчук аввалроқ уй қамоғига олинган. 2022 йил февраль ойида эса Украина Ички ишлар вазирлиги маълумотларига кўра, Медведчук уй қамоғидан қочиб кетган.
Владимир Зеленскийнинг сўзларига кўра, Медведчук Украина Хавфсизлик хизмати томонидан ўтказилган махсус операция давомида қўлга олинган. Украина президенти ўзининг Telegram каналида сиёсатчининг суратини эълон қилган. Суратда Виктор Медведчук украиналик аска кийимида ва кишанланган ҳолда тасвирланган.
Маълумотларга кўра, Медведчук давлатга хиёнат қилишда гумон қилиниб, Россиянинг кенг кўламли босқини бошланишидан олдин уй қамоғи олинган. Руслар ҳужуми арафасида партия аъзосининг рафиқаси Оксана Марченконинг Беларусга яширинча кетгани ҳақида маълумот пайдо бўлган. Тез орада Медведчукнинг ўзи ҳам қочиб кетган.
Тергов «Путиннинг чўқинтирган отаси» ёки «Путиннинг қадрдони» деб таърифланадиган сиёсатчининг қаерда яширинган бўлиши мумкинлиги ҳақидаги бир нечта оператив версияларга эга бўлган. Аммо Беларуснинг Бирлашган фуқаролик партияси раҳбари Медведчукни қидириш тафсилотларини ошкор қилишдан бош тортган ва бунинг учун махсус гуруҳ жалб қилинганлигини тасдиқлаган.
Украина давлат тергов бюроси 18 март куни Украина суди Медведчукни ҳибсга олишга рухсат бергани ҳақида хабар берган. Февраль ойи охирида Медведчукнинг адвокати Лариса Чередниченко у Киевдаги уйини тарк этгани, аммо шаҳарда қолганини айтган. Унинг уй қамоғи муддати 10 март куни тугаган.
Россия президенти матбуот котиби Дмитрий Песковнинг айтишича, у ҳибсга олингани айтилаётган Медведчук тушган суратни кўрган, аммо бу қанчалик ҳақиқат эканини тасдиқлай олмайди. «Мен Медведчукни кўрдим. Бу қанчалик ҳақиқат эканини айта олмайман. Ҳеч қандай тасдиқсиз нимадир дейиш нотўғри бўлади», — дейди Песков журналистларга.
Аввалроқ АҚШ Россия президенти Владимир Путиннинг «вояга етган фарзандлари»га қарши санкциялар киритганди.
