«Rost24» бош муҳаррири Анора Содиқова нашрнинг сайти ва «YouTube»даги каналидан Жаҳонгир Усмонов ва унга алоқадор корхоналар ҳақидаги суруштирув материали таҳдид ва босим сабабли ўчириб юборилганини маълум қилди. Содиқова ўчириб ташланган материални ўзининг Facebook саҳифасига жойлаган.

Мазкур видео остида журналист қуйидагича изоҳ қолдирган:

«Ҳақиқий журналистикага уринасан ҳамкасбларинг лом-мим демайди. Хато қилсанг жар солади. Сен изланиб ёзган материалингни буюртма, дея ўзларини овутишади. 4 ҳокимият бўлишга интилиб тайёрланган материаллар ортидаги босим ва таҳдидлар билан доим ёлғиз қолаверасан…

Аммо, мен бу мақолани президентнинг 4-ҳокимият бўлинглар, орқангизда мен турибман деган гапларига ишониб ёзгандим. Лекин, сайтдан олиб ташлашга мажбур бўлаяпман».

Ўчиртирилгани айтилаётган материал «ARDUS» қўшма корхонасининг бош директори, «Эзгу мақсад» хайрия жамоат фонди бошқарув раиси Жаҳонгир Усмонов фаолияти ҳақида тайёрланган. Жаҳонгир Усмонов марҳум сенатор, давлат ва жамоат арбоби Мираброр Усмоновнинг ўғли ҳисобланади.

Материалда қуйидаги маълумотлар берилган:

Бир нечта дунё раҳбари, сиёсатчи ва миллиардерларнинг махфий бойлик ҳамда молиявий ҳужжатлари фош этилган «Пандора ҳужжатлари»да Жаҳонгир Усмоновнинг ҳам исми бор.

«Жаҳонгир Усмонов бугунги кунда бир қатор компанияларни бошқариб келади ва бу компаниялар занжири бизни офшор ҳудудларга ва молиявий жиноятларга етаклайди», — деган мазкур материалда Анора Содиқова.

Шунингдек, таъкидланишича, Жаҳонгир Усмонов офшор ҳудуд ҳисобланган Британия Виржин оролларида 2014 йилда рўйхатдан ўтган «Winger Investments Limited»нинг ягона бенефициари ҳисобланади ва Европада бир нечта ҳисоблари мавжуд.

Журналист «Хоразм шакар» ва «Ангрен шакар»нинг йирик миқдордаги маблағларини чет элдаги офшор фирмалар ва ҳисоб-рақамларга олиб чиқиш учун «Эзгу мақсад» хайрия жамоат фонди восита сифатида фойдаланилганини таъкидлаган.

Қайд этилишича, фонд 5 йил давомила биронта ҳисобот эълон қилмаган. Фонд раҳбари Камола Шарипова эса «Rost24»га фонд ортида «катта оила» борлигини билдирган.

Мазкур материал ўчиртирилгандан кейин Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов воқеага муносабат билдирди.

«Журналист Анора Содиқова атрофида бўлаётган ҳолатдан биз хавотирдамиз. Қонун устувор давлатларда ҳар қандай зиддиятли ҳолатлар (агар у бўлса) фақат суд орқали ҳал қилиниши керак. Журналистга таҳдид қилишга, умуман таҳдидларга ҳеч ким ҳақли эмас. У замонлар ўтиб кетди. Қайтаришга уринманг. Фонд бу ҳолатни кузатиб боради», — деб ёзган Алламжонов.

Депутат Расул Кушербаев ҳам воқеага муносабат билдириб, жамоага қилинган таҳдидни кескин қоралашини маълум қилган.

«‘Rost 24’ яқинда ўтказган журналист суриштируви ортидан қаттиқ босимга учрагани сабабли ўзининг барча ресурсларидан ушбу материални олиб ташлабди.

Журналистлар жамоаси ва Анора Содиқовага бу сафар қудратли  ‘мафия’сифат кўча кучлар таҳдид қилгани айтилмоқда.

Биз ўз ишини бажараётган эркин журналистларнинг ҳар қандай таҳдид ва босимлардан ҳоли бўлишини, қонундаги кафолатлар амалда ҳам ишлашини истаймиз. Ҳуқуқни мухофаза қилувчи идоралардан буни талаб қиламиз: ишингизни қонун ва виждон олдида қатъият билан бажаринг!

Жамоага қилинган таҳдидни кескин қоралаймиз ва жамоани қўллаб-қувватлашимизни билдирамиз!», — деб ёзган депутат.

Эслатиб ўтамиз, Ўзбекистон Республикасининг «Оммавий ахборот воситалари тўғрисида»ги қонуни 5-моддасида шундай дейилади:

«Давлат оммавий ахборот воситаларининг фаолияти ва ахборотдан фойдаланиш эркинлигини, мулк ҳуқуқини, давлат органларининг ғайриқонуний қарорларидан, улар мансабдор шахсларининг ғайриқонуний ҳаракатларидан (ҳаракатсизлигидан) ҳимоя қилинишини кафолатлайди. Оммавий ахборот воситаларининг фаолиятига тўсқинлик қилиш ёки аралашиш тақиқланади».