Германия Усмонов синглисининг «Dilbar» яхтасини мусодара қилди
156 метрли яхта 600 млн долларга баҳоланган
Гамбург ҳукумати россиялик олигарх Алишер Усмоновнинг синглиси Гулбаҳор Исмоилованинг Европа Иттифоқи санкциялари остида қолган «Dilbar» яхтасини мусодара қилди. Бу ҳақда «Bloomberg» хабар берди.
Германия Федерал жиноят полицияси бошқармаси «Dilbar» яхтасининг эгаси Гулбаҳор Исмоилова эканини аниқлаган. Дастлаб яхта Алишер Усмоновга тегишли бўлган.
«Шу сабабли ҳашаматли ‘Dilbar’ яхтаси санкциялар қонунига бўйсунади ва Гамбургда қонуний равишда мусодара қилиниши мумкин», дейилади хабарда.
Таъкидланишича, 156 метрли кема расман дунёдаги сиғими энг катта яхта деб тан олинган. Унинг тоннажи 15 917 тоннани, ички биноларнинг умумий майдони эса 3800 квадрат метрни ташкил этади. Яхтани 1875 йилда Бременда асос солинган Германиянинг «Lürssen» кемасозлик компанияси қурган бўлиб, компания мазкур яхта бир вақтнинг ўзида 40 нафаргача одамни сиғдира олишини айтган.
Мавзуга доир: Фото: Алишер Усмоновнинг Германия тортиб олаётган «Dilbar» яхтаси қандай кўринишга эга ва қанчага баҳоланган?
Аввалроқ Франция ҳукумати Алишер Усмоновга алоқадор 2 та вертолётни ҳибсга олганди. Шунингдек, Усмоновнинг санкция остидаги самолёти ЕИдан Тошкентга учгани аниқланган.
