Тошкент метрополитенининг Пушкин бекатида 20 ёшли йигит қасддан поезд йўлагига ўзини ташлагани хабар қилинганди. Транспорт прокуратураси ҳолат юзасидан қўшимча маълумот берди.

Бош прокуратура матбуот котиби йигит қиз дўсти билан гап талашиб, келиша олмагани ҳақида хабар берганди. Бундан сўнг у ўзини электропоезд тагига ташлаган.

Олиб борилган ўрганиш ишларида машинист поездни тезкор тўхтатиши натижасида фуқаро омон қолгани аниқланди. Бекат платформасида хизмат олиб бораётган Метрополитенда хавфсизликни таъминлаш бўлими ходими томонидан фуқаро А.Б. дарҳол йўлакдан олиб чиқилган. Хозирги вақтда Тошкент транспорт прокуратураси томонидан терговга қадар текширув харакатлари амалга оширилмоқда.

Аввалроқ фуқаро тез тиббий ёрдам ходимлари томонидан кўрикдан ўтказилганида, унга ҳеч қандай тан жарохати етказилмагани аниқланганди.