АҚШ Россияга ёрдам берадиган давлатларни огоҳлантирди

Байден маъмурияти Россия қарши санкцияларни четлаб ўтишда ёрдам берадиган давлатларни огоҳлантирди. Бу ҳақда «Reuters» хабар берди.

АҚШ президентининг миллий хавфсизлик бўйича маслаҳатчиси Жейк Салливан бу бўйича маълумот берган. У Россия санкцияларидан қочишга қарши янги чоралар қўлланилиши ва бу икки ҳафта ичида эълон қилинишини айтган.

«Ўйлайманки, яқин бир-икки ҳафта ичида биз Россияга санкциялардан қочишга ёрдам бермоқчи бўлган мамлакат ва ташкилотлар ҳақида маълумот оламиз. Бу Россия ичида ва ташқарисида бўлганларни ҳам қамраб олади. Мазкур мамлакатлар нишонимизга айланади», — дейди Салливан.

Аввалроқ Россия Украинага қурол етказиб берган давлатларга нота юборганди. Унда қуроллантириш қандай оқибатларга олиб келиши айтилган. Шунингдек, Туркия Россияга қарши санкцияларга қўшилиш шартини маълум қилганди.

“Bugun.uz” янгиликларини “Telegram”да кузатиб боринг