Қашқадарё вилояти Косон тумани тиббиёт бирлашмаси ходимлари мажбурий меҳнатга жалб этилди. Бу ҳақда вилоят Соғлиқни сақлаш бошқармаси ахборот хизмати хабар берди.

Маълум бўлишича, туман тиббиёт бирлашмаси ва ҳудуддаги давлат меҳнат ҳуқуқ инспекцияси мутахассислари томонидан ҳолат бўйича ўрганиш олиб борилган. Аниқланишича, бирлашманинг диагностика бўлими олд томонидаги ер участкасида 12 апрель куни мазкур бўлим бошлиғи Х.О. томонидан ишчи-ходимлар ободонлаштириш ишларига жалб қилинган.

Мазкур ҳолат юзасидан бўлим бошлиғига нисбатан қонунда белгиланган тартибда чора кўрилади. Ўрганишларда гул кўчатлари учун пул йиғилгани ҳақидаги маълумотлар тасдиқланмади.

Аввалроқ Қашқадарёда ўқитувчиларни мажбурий меҳнатга жалб қилган мактаб директори лавозимидан олингани ҳақида хабар берилганди.