Нукусда шифокорлар вазифасини етарлича бажармагани сабаб чақалоқ вафот этгани хабар қилинганди. Олий суд матбуот котибининг маълум қилишича, шифокорларга ҳукм ўқилди.

Келтирилишича, 18 апрель куни жиноят ишлари бўйича Нукус шаҳар суди биносида жиноят ишлари бўйича Мўйноқ туман суди томонидан қуйидаги шахсларга оид жиноят ишини кўриб чиқиш бўйича суд жараёни тугаб, суд ҳукми эълон қилинган:

• Д.Абыллаева (1973 йилда Нукус шаҳрида туғилган, Қорақалпоғистон Ҳудудий перинатал маркази шифокори, оилали, 3 нафар фарзанди бор, муқаддам судланмаган);
• Р.Сайманова (1972 йилда Кегейли туманида туғилган, Қорақалпоғистон Болалар кўп тармоқли тиббиёт маркази шифокори, оилали, 2 нафар фарзанди бор, муқаддам судланмаган);
• Г.Калимбетова (1988 йилда Нукус шаҳрида туғилган, Қорақалпоғистон Патологик анатомия бюроси шифокори, оилали, 1 нафар фарзанди бор, муқаддам судланмаган).

Мазкур ҳукмга кўра:

Д.Абыллаева Жиноят кодексининг 116-моддаси (Касб юзасидан ўз вазифаларини лозим даражада бажармаслик) 3-қисми (25,168-моддаси 1-қисми ва 28,211-моддаси 1-қисми (бошқа жиноят иши доирасида)да назарда тутилган жиноятларни содир этганликда айбдор деб топилиб, унга узил-кесил ўташ учун 2 йил муддатга чақалоқларга реанимацион ёрдам бериш фаолияти билан боғлиқ лавозимларда ишлаш ҳуқуқидан маҳрум этган ҳолда, 4 йил муддатга озодликни чеклаш жазоси тайинланди.

Р.Сайманова Жиноят кодексининг 116-моддаси 3-қисмида назарда тутилган жиноятни содир этганликда айбдор деб топилиб, унга узил-кесил ўташ учун 2 йил муддатга чақалоқларга реанимацион ёрдам бериш фаолияти билан боғлиқ лавозимларда ишлаш ҳуқуқидан этган ҳолда, 2 йил муддатга озодликни чеклаш жазоси тайинланди.

Г.Калимбетованинг хатти-ҳаракатларида Жиноят кодексининг 116-моддаси 3-қисмида назарда тутилган жиноят аломатлари мавжуд бўлмагани боис айбсиз деб топилиб, Жиноят-процессуал кодексининг 83-моддаси (реабилитация учун асослар) 2-бандига асосан оқланди.