Жамият, Тошкент вил. - 12:40 · 18.04.2022

Тошкент вилоятида ички ишлар ходимлари ва фуқаролар ўртасида жанжал юз берди — видео

Тошкент вилояти Юқори Чирчиқ туманида ички ишлар органи ходимлари ва фуқаролар ўртасида келишмовчилик содир бўлди. Ички ишлар вазирлиги матбуот котиби ҳолат бўйича муносабат билдирди.

Кадр: Telegram/ @mobilmuxbiruz

Қайд этилишича, туманда йўлнинг қатнов қисмида ҳаракат хавфсизлигига халақит бериб қулупнай савдоси билан шуғулланаётган фуқароларнинг жамоат хавфсизлигини таъминлаш мақсадида ички ишлар органлари ходимлари жалб этилган. Фуқаролар уларга қаршилик кўрсатиб жанжал кўтарган.

Юзага келган хавф зудлик билан бартараф этилиб, жамоат хавфсизлиги таъминланган. Жамоат тартибини бузган барча иштирокчиларнинг шахси аниқланиб, улар билан суриштирув ишлари олиб борилмоқда.

Воқеа жойида қасддан ички ишлар органлари ходимларнинг қонуний талабларини бажармаслик, уларга қаршилик кўрсатиш каби чақириқлар қилган фуқаролар ҳам аниқланган.

«Бундай ҳодисаларни бўрттириш ва ички ишлар органлари ходимларини ёмонотлиқ қилиб кўрсатишга шайланган «жамоатчилик вакиллари» фаоллашганлигини инобатга олиб, ҳақиқий жамоатчилик назорати субъектларидан йўл ёқаларидаги тартибсиз савдо-сотиқ билан боғлиқ муаммолар, улар ортидан келиб чиқаётган йўл-транспорт ҳодисалари ва ҳоказо масалаларга кўпроқ эътибор қаратишларини мақсадга мувофиқ деб ҳисоблаймиз», — дейди матбуот котиби.

Аввалроқ Қашқадарёда фуқаролар ва ички ишлар ходимлари ўртасида жанжал келиб чиққани ҳақида хабар берилганди. Вилоят ИИБ ҳолат юзасидан тушунтириш бериб, ходимлар жамоат тартибини сақлаганини маълум қилган.