Тошкент вилояти Янгийўл туманида 18 апрель куни «Lada-Largus» ва «Isuzu» ўртасидаги ЙТҲ сабаб 2 киши ҳалок бўлди. Бу ҳақда вилоят Ички ишлар бош бошқармаси ахборот хизмати хабар берди.

Маълум бўлишича, соат 06:15 да М-39 автомобиль йўлининг 829-километрида ҳайдовчи — 1980 йилда туғилган У.И. «Lada-Largus» автомобилида ҳаракатланаётиб, ухлаб қолган. Оқибатда йўлнинг ўнг четида тўхтаб турган ҳайдовчи — 1976 йилда туғилган У.У. бошқарувидаги «Isuzu» русумли юк автомобилининг орқа томонига тўқнашган.

Ҳодиса сабаб «Lada-Largus» йўловчилари — 1983 йилда туғилган М.О. ва 2010 йилда туғилган О.Ж. олган оғир тан жароҳатлари туфайли воқеа жойида ҳалок бўлган. Шунингдек, яна бир йўловчи шифохонага ётқизилган.

Мазкур ЙТҲ юзасидан Янгийўл тумани ИИБ ҳузуридаги тергов бўлинмаси томонидан дастлабки тергов ҳаракатлари олиб борилмоқда. «Барча ҳайдовчилардан чарчоқ ҳолатида транспорт воситасини бошқармасликларини, қоидаларга риоя қилишларини сўраймиз», дейилган хабарда.

Аввалроқ Хоразмда маст ҳайдовчи сабаб 6 та автомобиль иштирокида ЙТҲ содир бўлгани хабар қилинганди. Шунингдек, Тошкент вилоятида икки йўловчи автобуси пойга ўйнаши оқибатида ЙТҲ содир бўлган.