Тожикистон президенти Эмомали Раҳмон Қирғизистон билан чегара масалалари тезроқ ҳал этилиши тарафдори эканини айтди. Бу ҳақда «Knews» хабар берди.

Президент Сўғд вилоятига сафари доирасида Исфара шаҳри аҳолиси билан суҳбатда бу ҳақида гапирган. У қирғиз-тожик чегарасини демаркация ва делимитация қилиш «асосий масалалардан бири» экани ва уни музокаралар йўли билан ҳал этиш тарафдори эканини айтган.

Тожикистон президентининг сўзларига кўра, икки давлат чегарасини делимитация ва демаркация қилиш бўйича 2002 йилдан буён 170 дан ортиқ учрашув ва музокаралар ўтказилган. Икки давлат ўртасидаги 987 километрлик чегаранинг 663,7 километри, яъни чегара чизиғининг 68,4 фоизи аниқланиб, келишиб олинган. Эмомали Раҳмон мавжуд муаммоларни манфаатли ечим орқали ҳал қилиш тарафдорилиги, бироқ бу жуда мураккаб жараён бўлиб, мутахассислардан кўп вақт ва куч талаб этилишини айтган.

Тожикистон раҳбари аҳолини ҳиссиётларга берилмасликка чақирган. Исфараликларга қўшнилар билан ўзаро ҳамжиҳатлик ва яхши қўшничилик муҳитида яшаш ва ишлаш, улар билан дўстона ҳамкорликни йўлга қўйиш, бағрикенг бўлиш, ҳис-туйғуларга берилмасликка чақирган.

Маълумот ўрнида, аввалроқ Садир Жапаров қирғиз-тожик можаросига муносабат билдириб, қўшни давлат раҳбарларини ҳақорат қилмасликка чақирганди.