Жамият, Тошкент ш. - 9:01 · 19.04.2022

Камолиддин Раббимовнинг ўзи атрофидаги воқеаларга изоҳ берди

Сиёсатшунос Камолиддин Раббимов 17 апрель куни ички ишлар органи ходимлари фаолиятига аралашгани ҳамда унга нисбатан тегишли чора кўрилгани хабар қилинганди. Фуқаро ижтимоий тармоқлар орқали бўлиб ўтган воқеаларга изоҳ берди.

Фото: Facebook / @Kamoliddin Rabbimov

Тошкент шаҳри Шайхонтоҳур тумани «Чақар» маҳалласида 17 апрель куни ўтказилаётган санитария-профилактик тадбирлар жараёнида Камолиддин Раббимов хизмат вазифасини бажараётган ходимларнинг фаолиятига асоссиз аралашганди. Раббимов уларнинг ишига тўсқинлик яратиб, қонуний талабларини бажармаган. Ҳолат юзасидан белгиланган тартиб асосида ҳужжатлар расмийлаштирилиб, судга юборилган.

Келтирилишича, 18 апрель куни жиноят ишлари бўйича Шайхонтоҳур туман судида К. Раббимов (1977 йилда Самарқанд вилоятида туғилган) ва Ш. Самандаров (1997 йилда Хатирчи туманида туғилган) га нисбатан маъмурий ҳуқуқбузарлик тўғрисидаги иш кўриб чиқилган. Судда сиёсатчига нисбатан 15 сутка маъмурий қамоқ жазоси тайинланган. Фуқаро томонидан келтирилган апелляция шикояти Тошкент шаҳар судининг жиноят ишлари бўйича судлов ҳайъати апелляция инстанциясида кўриб чиқилиб, судининг қарори ўзгартирилган. Унга базавий ҳисоблаш миқдорининг 2 баравари миқдорида жарима жазоси тайинланган.

Шунингдек, Камолиддин Раббимов мазкур ҳолат юзасидан изоҳ бериб, фуқаролардан ушбу вазиятни сиёсийлаштирмасликни сўраган.

«Ассалому алайкум қадрли дўстлар, мени тақдиримга бефарқ бўлмаганингиз учун барчангизга рахмат. Хозир уйдаман, ҳаммаси яхши. 17 апрель, кечки соат 19:00 атрофида Чорсу бозори ёнида рейд бўлаётганди, қонун устуворлигини шахсий талқинимда ўлчаб, ушбу вазиятга аралашган эдим.

Лекин мен ИИВ ходимларининг ишларига аралашганим хато эканини тушунаман. Менга нисбатан қонун моддаларига кўра, жарималар белгиланган, уларни ўз вақтида тўлаш ниятидаман. Қолган тафсилотларини кейинчалик билдиришга ҳаракат қиламан. Илтимос, бу ишни сиёсийлаштирмаслигингизни сўрайман. Бу ерда мен томонимдан йўл қўйилган хатолар мавжуд эди. Ҳаммага каттадан-катта рахмат!», — дейди у.