Жамият - 0:04 · 19.04.2022

Ўзбекистон ҳарбийлари Афғонистон ҳудудидан ракеталар билан ўққа тутилгани ҳақидаги хабарлар рад этилди

Термиз шаҳри атрофида Ўзбекистон ҳарбийлари Афғонистон ҳудудидан ракеталар билан ўққа тутилгани айтилди. Президент матбуот хизмати ҳолат юзасидан расмий маълумот берди.

Фото: «Sputnik»

Маълум қилинишича, айрим Telegram каналлар томонидан Термиз шаҳри атрофида Ўзбекистон ҳарбийлари Афғонистон ҳудудидан ракеталар билан ўққа тутилгани тўғрисида тарқатилаётган хабарлар мутлақо ҳақиқатга тўғри келмайди.

«Ўзбекистон Мудофаа вазирлиги ва Чегара қўшинлари берган маълумотга кўра, Ўзбекистон–Афғонистон чегарасида ҳеч қандай ҳарбий фаоллик кузатилмаяпти, вазият барқарор», дейилади хабарда.

Аввалроқ Ўзбекистон ва Тожикистон ишчи гуруҳи чегара масаласида учрашув ўтказганди. Шунингдек, ўзбек–қирғиз чегарачилари 10 бош от сабаб музокара ўтказгани маълум қилинганди.