Жамият - 0:50 · 19.04.2022

Сиёсатшунос Камолиддин Раббимовга нисбатан жарима жазоси тайинланди

Сиёсатшунос Камолиддин Раббимов 15 суткага қамалгани ҳақида маълумот тарқалган. Ички ишлар вазирлиги матбуот хизмати ҳолат юзасидан муносабат билдирганди. Маълумотларга кўра, сиёсатшуносга нисбатан жарима жазоси тайинланган. Бу ҳақда Тошкент шаҳар судлари матбуот хизмати хабар берди.

Фото: Facebook / @Kamoliddin Rabbimov

Маълум қилинишича, 2022 йил 18 апрель куни жиноят ишлари бўйича Шайхонтоҳур туман судида К. Раббимов (1977 йилда Самарқанд вилоятида туғилган) ва Ш. Самандаров (1997 йилда Хатирчи туманида туғилган) га нисбатан маъмурий ҳуқуқбузарлик тўғрисидаги иш кўриб чиқилган.

Аниқланишича, 2022 йил 17 апрель куни К. Раббимов ва Ш. Самандаров Тошкент савдо маркази (Шайхонтоҳур тумани) олдидаги жамоат жойида шовқин қилиб туришган вақтда шу ерда хизмат олиб бораётган ички ишлар органлари ходимлари келиб, уларнинг шахсини аниқлаш мақсадида ИИБ биносига таклиф қилишганда, уларга қаршилик кўрсатиб, ички ишлар органлари ходимларининг қонуний талабларини бажармасдан, уларни омма олдида ҳақорат қилган.

Ҳуқуқбузарлар К. Раббимов ва Ш. Самандаровнинг ҳаракатлари ишда мавжуд тўпланган далиллар, жабрланувчи З. Турсуновнинг аризаси, гувоҳларнинг тушунтириш хатлари ва бошқа ҳужжатлар билан ўз тасдиғини топган.

Суднинг қарорига кўра: К. Раббимов Маъмурий жавобгарлик тўғрисидаги кодекснинг 183-моддаси (майда безорилик), 194-моддаси (ички ишлар органлари ходимининг қонуний талабларини бажармаслик) 1-қисми ва 195-моддаси (ички ишлар органлари ходимларининг ўз хизмат бурчларини бажаришларига қаршилик кўрсатиш) да назарда тутилган маъмурий ҳуқуқбузарликларни содир этган деб топилиб, унга Маъмурий жавобгарлик тўғрисидаги кодекснинг 34-моддаси (бир неча ҳуқуқбузарликни содир этганлик учун маъмурий жазо қўлланиш) га асосан узил-кесил 15 сутка маъмурий қамоқ жазоси тайинланган.

Ш. Самандаров Маъмурий жавобгарлик тўғрисидаги кодекснинг 194-моддаси 1-қисмида назарда тутилган ҳуқуқбузарликни содир этган деб топилиб, унга базавий ҳисоблаш миқдорининг бир баравари миқдорида жарима жазоси тайинланган.

Ушбу қарор устидан К. Раббимов томонидан келтирилган апелляция шикояти Тошкент шаҳар судининг жиноят ишлари бўйича судлов ҳайъати апелляция инстанциясида кўриб чиқилиб, 2022 йил 18 апрелдаги жиноят ишлари бўйича Шайхонтоҳур туман судининг К. Раббимовга нисбатан чиқарилган қарори ўзгартирилган.

«Тошкент шаҳар судининг жиноят ишлари бўйича судлов ҳайъати апелляция инстанциясининг 2022 йил 18 апрелдаги қарори билан К. Раббимовга узил-кесил базавий ҳисоблаш миқдорининг 2 баравари миқдорида жарима жазоси тайинланиб, апелляция шикояти қаноатлантирилди. Қарорнинг қолган қисми ўзгаришсиз қолдирилди», дейилади хабарда.

Аввалроқ Россиялик саёҳатчи-блогер Максим Лимар квадрокоптер туфайли Ўзбекистондан Новосибирскка уча олмаганди. Шунингдек, Жиноят ишлари бўйича Хоразм вилояти Ҳазорасп тумани суди фуқаро С.Б.га Президентни ҳақорат қилгани учун 3 йил муддатга озодликдан маҳрум қилиш жазосини тайинлаганди.