Жамият, Тошкент вил. - 9:09 · 20.04.2022

Тошкент вилоятида аёлнинг фарзандини даволаш учун йиққан эҳсон пули ўзлаштирилди

Тошкент вилояти Ангрен шаҳрида аёлнинг фарзандини даволаш учун йиққан эҳсон пулини мактаб ўқувчиси ўзлаштирди. Бу ҳақда вилоят Ички ишлар бош бошқармаси ахборот хизмати хабар берди.

Фото: Тошкент вилояти ИИББ

Қайд этилишича, шаҳарнинг Тараққиёт МФЙда яшовчи 45 ёшли фуқаро М.С. (аёл) ИИБга ариза билан мурожаат қилган. Унда фарзандини даволатиш учун моддий ёрдам йиғиш мақсадида ижтимоий тармоққа пластик карта эълон қилгани айтилган. Шунингдек, аёл карта ҳисобига 600 минг ўтказишини айтиб қўнғироқ қилган номаълум фуқаро унинг ҳисобидан 2 миллион сўмни ечиб олганини маълум қилган ва ҳолат юзасидан қонуний чора кўришни сўраган.

Аризага асосан вилоят ИИББ Ахборот технологиялари соҳасидаги жиноятларга қарши курашиш ҳамда шаҳар жиноят қидирув бўлими тезкор ходимлари томонидан суриштирув ишлари олиб борилган. Аниқланишича, буни Қорақалпоғистонда яшовчи 18 ёшли Ж.А. (11 синф ўқувчиси) содир этган.

Ушбу ҳолат юзасидан фуқаро Ж.А.га нисбатан Жиноят кодексининг 169-моддаси (Ўғрилик) 1-қисми билан жиноят иши қўзғатилган. Тергов ҳаракатлари олиб борилмоқда.

Аввалроқ Фарғонада коллеж ҳисобчиси ўқитувчиларнинг номига карта очиб, 4,3 миллиард сўмни онлайн қиморга тикиб юборгани ҳақида хабар берилганди.