Россия Давлат думаси 20 апрель кунги ялпи мажлисда Ўзбекистон билан республика фуқароларининг Россияда мажбурий рўйхатга олинишини Россияга кирган кундан бошлаб 15 кунгача узайтириш ҳақидаги келишувни ратификация қилди. Бу ҳақда «Sputnik» хабар берди.

Маълум қилинишича, янги қоидалар Ўзбекистонга вақтинчалик келаётган россияликларга ҳам тегишли. «Бу бир томон давлати ҳудудида вақтинча истиқомат қилувчи фуқароларни бошқа томон давлати ҳудудида жойлашган мамлакат ваколатли органларида кириш санасидан бошлаб 15 кунга рўйхатдан ўтиш (яшаш жойи бўйича рўйхатдан ўтиш) мажбуриятидан озод қилишни назарда тутади», дейилади хабарда.

Қайд этилишича, ҳозирги кунда Россияда рўйхатдан ўтишдан 15 кунлик озодлик Беларусь, Қозоғистон, Қирғизистон, Тожикистон ва Арманистон фуқароларигагина тегишли. Ўзбеклар учун Россияда бундай муддат 7 кун, Ўзбекистонда руслар учун эса 3 кун билан чегараланган.

Келтирилишича, Ўзбекистон фуқароларининг Россия ҳудудида ва Россия фуқароларининг Ўзбекистон ҳудудида бўлиш тартиби тўғрисидаги келишув 2021 йилнинг 17 июнида имзоланган. Ўзбекистон томони барча ратификация жараёнларини якунлаган, Москванинг эса бу жараённи якунлаши кутилган.

Битим Ўзбекистон Россия томони унинг кучга кириши учун зарур бўлган давлат ички тартиб-қоидалари бажарилгани тўғрисида билдиришнома олган кундан бошлаб кучга киради.

Аввалроқ Тожикистон парламенти қуйи палатаси 28 март куни бўлиб ўтган йиғилишда Ўзбекистон билан ҳукуматлараро битимга ўзгартиришлар киритиш тўғрисидаги протоколни маъқуллаганди.