Ижтимоий тармоқларда Қашқадарё вилояти Деҳқонобод туманида аёллар қудуқдан ичимлик суви олиш учун талашиб жанжаллашгани акс этган видео тарқалди. Туман ҳокимлиги воқеага муносабат билдирди.

Воқеа акс этган видеода аёллар тумандаги «Нурли келажак» маҳалласида яшаши айтилган.

Мазкур ҳолат 2022 йилнинг 19 апрель куни туман ҳокими ўринбосари Шердил Эргашев ҳамда «Қашқадарё сув таъминоти» масъулияти чекланган жамиятининг туман бўлими бошлиғи Суюн Алланазаровлар иштирокида ўрганилган.

Таъкидланишича, маҳалла ҳудудидаги булоқ қиш ва баҳор фаслининг ўз вақтида ёғингарчиликларсиз келгани ҳисобига қуриб қолмоқда. Тўғрироғи, сув чиқиши анча камайган.

Ҳокимлик баёнотида, шунингдек, мазкур муаммо масъуллар, шахсан туман ҳокими назоратига олингани, аҳолининг сувсизлик масаласидаги ҳар бир мурожаати ўз вақтида ўрганилгани айтилган. Ҳатто ўтган мавсумда сув ташувчи махсус автомобиллар орқали аҳолига тоза ичимлик суви етказиб берилгани қўшимча қилинган.

Туман ҳокими ўринбосари ҳамда «Қашқадарё сув таъминоти» МЧЖ туман бўлими бошлиғи аҳолига 2022 йил якунига қадар Оқсув суви тортиб келинишини, Доққи—Бойқўрғон сув қувури таъмирланишини маълум қилган.

Аввалроқ Наманганда сув талашган фуқароларнинг бири иккинчисини ўлдириб қўйганди. Шунингдек, Сурхондарёда эркак сув талашиб, фуқаронинг бошига кетмон билан урган.