Сирдарё вилояти Янгиер шаҳрида 21 апрель куни «Nexia-3» автомобилининг газ баллони портлаб кетди. Бу ҳақда вилоят Ички ишлар бошқармаси ахборот хизмати хабар берди.

Маълум бўлишича, ҳодиса соат 09:50 атрофида шаҳарнинг А.Жомий МФЙ Пахтакор кўчасида содир бўлган. Аниқланишича, «Ватанпарвар» ташкилоти биноси рўпарасида қолдирилган, ҳайдовчи 1994 йилда туғилган Б.Қ.га тегишли «Nexia-3»нинг газ баллони портлаган.

Оқибатда автомашина буткул яроқсиз ҳолга келган ва ёнидаги 2 та автотранспорт воситаларига техник зарар етган. Ҳодисада тан жароҳати олган фуқаролар йўқ. Ҳозирда вилоят ФВБ ва ЙҲХБ ходимлари томонидан дастлабки суриштирув ишлари олиб борилмоқда.

Аввалроқ Қашқадарёда тўхтаб турган «Cobalt» машинасининг газ баллони портлаб кетгани ҳақида хабар берилганиди.