Жамият - 11:15 · 22.04.2022

Ўзбекистон ТИВ Афғонистондаги портлашларни кескин қоралади

Ўзбекистон Ташқи ишлар вазирлиги Афғонистоннинг 3 шаҳрида содир этилган террорчилик ҳаракатлари бўйича позициясини билдирди. Вазирлик ахборот хизмати бу бўйича маълумот берди.

Фото: Ўзбекистон ташқи ишлар вазирлиги

Маълум қилинишича, Кобул, Мозори-Шариф ва Қундуз шаҳарларида юз берган портлашларни Ўзбекистон ТИВ кескин қоралайди. Шу билан бирга, буларнинг оқибатида ҳалок бўлганларнинг оила аъзолари ва яқинларига ҳамдардлик билдирилди.

«Ўзбекистон муқаддас Рамазон ойи кунларида Кобул, Мозори-Шариф ва Қундуз шаҳарларида содир этилган террорчилик ҳаракатларини қатъий қоралайди.

Тинч аҳоли орасида кўплаб қурбонларга сабаб бўлган зўравонлик ҳаракатлари Афғонистонда барқарор тинчлик ва миллий тотувлик ўрнатилишига тўсқинлик қилади.

Ўзбекистон томони ҳалок бўлганларнинг оила аъзолари ва яқинларига чуқур ҳамдардлик билдиради, шунингдек, жароҳатланганларнинг тезроқ соғайиб кетишини тилайди», — дейилади хабарда.

Аввалроқ Кобулдаги мактабларда кучли портлаш содир бўлгани ҳақида хабар қилинганди. Гувоҳлар 100 га яқин одам ҳалок бўлгани ва яраланганини айтган.