Ўзбекистонда давлат буюртмасига оид маълумотлар мажбурий тартибда эълон қилинади

«Ижтимоий шериклик ҳамда жамоатчилик назоратини амалга ошириш механизмларини янада такомиллаштириш чора-тадбирлари тўғрисида»ги ҳукумат қарори қабул қилинди. Бу ҳақда Адлия вазирлиги ахборот канали хабар берди.

Қарорга кўра, 2022 йил 1 декабргача «e-ngo.uz» электрон порталида ижтимоий шериклик ва жамоатчилик назоратини амалга оширишнинг қуйидаги механизмлари жорий этилади:

• нодавлат нотижорат ташкилотлар(ННТ) томонидан дастурлар ишлаб чиқишда қатнашиш, уларнинг ижросини мониторинг қилиш, мониторинг натижаси бўйича кўриб чиқилиши мажбурий бўлган ҳужжатни, қонунчилик ҳужжатлари лойиҳаларига оид таклифларни масъул давлат органларига киритиш;
• ННТларнинг дастурлар юзасидан берган таклифларини кўриб чиқиш натижаларини электрон порталга жойлаштириш;
• ННТларнинг жамоатчилик назорати якунлари бўйича тайёрлаган ҳужжатларини давлат органларига юбориш ва уларни кўриб чиқиш натижаларини эълон қилиш.

Қайд этилишича, 2023 йил 1 январдан қуйидагилар давлат органлари ва ташкилотлари томонидан электрон порталга мажбурий жойлаштирилади:

• ижтимоий ва иқтисодий дастурларнинг лойиҳалари;
• лойиҳаларни амалга ошириш учун ННТларга давлат ижтимоий буюртмасини беришга оид эълонлар;
• келгуси йил учун жамоат фондларига юбориладиган буюртманомалар;
• давлат ижтимоий буюртмаси натижалари, маблағларнинг сарфланиш ҳолати.

Маълумот учун, мазкур электрон портал Адлия вазирлиги томонидан нодавлат нотижорат ташкилотларига онлайн хизмат кўрсатиш мақсадида ишлаб чиқилган.

Аввалроқ Ўзбекистонда савдо ва хизмат кўрсатишда маълумотлар давлат тилида тақдим этилиши мажбурий этиб белгилангани ҳақида хабар қилинганди.

“Bugun.uz” янгиликларини “Telegram”да кузатиб боринг