Жамият, Самарқанд - 23:04 · 24.04.2022

Самарқандда ИИБ машинасида болалар «грузовой»га ортгандай олиб кетилаётгани айтилди

Самарқанд вилоятида 23 апрель куни Ички ишлар бошқармаси машинасида болалар «грузовой»га ортгандай олиб кетилаётгани айтилди. Вилоят ИИБ ҳолат юзасидан муносабат билдирди.

Кадр: Telegram

Маълум қилинишича, шу куни Самарқанд вилояти Ички ишлар бошқармаси Жамоат хавфсизлиги хизмати Ҳуқуқбузарликлар профилактикаси бошқармасига қарашли Вояга етмаганларга ижтимоий ҳуқуқий ёрдам кўрсатиш маркази ходими ўзига бириктирилган «Damas» транспорт воситаси билан 3 нафар вояга етмаганларни тиббий кўрикдан ўтказиб, марказга олиб қайтаётган бўлган.

Тасвирлардаги ҳолатда вояга етмаган А.А. машинанинг пастга туширилган орқа ўриндиғида ётиб кетгани акс этган. Қолган икки нафар бола машинанинг ўрта қаторидаги ўриндиқда ўтириб кетган. Машинадаги вояга етмаганларни назоратсиз қолдирган ходимга нисбатан вилоят ИИБ масъул ходимлари томонидан хизмат текшируви тайинланиб, якуни бўйича қатъий чора кўрилиши белгиланган.

«Шу ўринда айрим тармоқ фаоллари, журналист ва блогерлардан ҳолатни текширмасдан, бузиб талқин қилмасликларини сўраймиз!», дейилади хабарда.

Аввалроқ Самарқанд вилоятида ички ишлар ходимлари фуқаронинг дўконини бузиб ташлаётгани айтилган хабар тарқалганди. Вилоят Ички ишлар бошқармаси ахборот хизмати ҳолатга муносабат билдирганди. Шунингдек, Самарқанддаги масжидда орган ходимлари ёш болани сўроқ қилгани хабар қилинганди.