Ўзбекистонлик кинорежиссёр Сарвар Каримов журналист Фаррух Худоёров билан бўлган суҳбатда Ўзбекистонда санъатга бўлган ёндашув нотўғри эканини таъкидлади.

Кинорежиссёр кино инсонларга тарбия бериш вазифасини олмаслигини айтди.

«Бизнинг санъатга бўлган ёндашувимиз нотўғри. Масалан кинони оладиган бўлсак, нуқул кино ёшларни тарбиялаши керак деймиз, ватанпарварлик руҳида қилиш керак одамларни ва яна бир нарсалар… Кинони унақа функциялари йўқ, Худо ҳайрингларни бергур. Кино тарбия бермайди одамга. Кинони функциялари бошқача.

Мен ҳар доим айтаман бу нарсани, кинонинг иккита функцияси бор. Биринчиси сизни кундалик муаммоларингиздан чалғитиб, миянгизни сал бўлса ҳам дам олишига хизмат қилади, у комедия бўлса, куласиз, қўрқинчли фильм бўлса, қўрқасиз… Иккинчиси сизни сал бўлса ҳам мушоҳадага чорлаши мумкин. Яъни кинонинг асосий вазифаси сизни вақтингизни мазмунли ўтказиш, тарбиялаш эмас. Биз кинога тарбиявий инструмент сифатида қарашни тўхтатишимиз керак», — деди Сарвар Каримов.