Жамият, Самарқанд - 22:02 · 25.04.2022

ДХХ фуқарони 40 минг долларга АҚШга юбормоқчи бўлган эркакни ушлади

Давлат хавфсизлик хизмати Самарқандда фуқарони 40 минг доллар эвазига АҚШга юбормоқчи бўлган жиноий гуруҳ аъзосини ушлади. Бу ҳақда вилоят Ички ишлар бошқармаси хабар берди.

Фото: Самарқанд вилоят Ички ишлар бошқармаси

Маълум қилинишича, Самарқанд вилояти ИИБ ҳамда ДХХ вилоят бошқармаси ходимлари томонидан ўтказилган тезкор тадбирда Ўзбекистон фуқароларини алдов йўли билан Туркия ва Лотин Америкаси давлатлари орқали АҚШга ноқонуний юбориш билан шуғулланувчи жиноий гуруҳ фаолиятига чек қўйилган.

Хусусан, Самарқанд туманида яшовчи 1982 йилда туғилган Х.Д. АҚШда истиқомат қилувчи жиноий шериги, 1978 йилда туғилган Х.Ж. билан ўзаро жиноий тил бириктириб, маҳаллий фуқарони 40.000 доллар эвазига айланма йўллари орқали АҚШга юборишни ваъда қилган. Олдиндан келишилган маблағнинг 5.000 долларини олган вақтида ашёвий далиллар билан ушланган.

Ҳозирда юқоридаги шахсларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.

Аввалроқ Давлат хавфсизлик хизматининг Самарқанд вилояти бўйича бошқармаси ҳамда вилоят Ички ишлар бошқармаси ходимлари ўтказилган тезкор тадбир давомида маҳаллий фуқароларни Америка Қўшма Штатларига ноқонуний юборилиши билан боғлиқ ҳолатга чек қўйганди.