Шавкат Мирзиёев раислигида 26 апрель куни ўтказилаётган видеоселектор йиғилишида «Андижон полькаси» рақсини UNESCO номоддий маданий мерос рўйхатига киритиш ташаббуси илгари сурилди. Бу ҳақда журналист Азиза Қурбонова хабар берди.

Таъкидланишича, 2022 йилда «Андижон полкаси» ўзбек халқ чолғу куйи ва рақсининг 100 йиллиги кенг нишонланади. Бу рақс нафақат андижонликларнинг, балки кўпмиллатли Ўзбекистоннинг энг севимли ва жўшқин рақсларидан бири ҳисобланади.

«Миллий куй ва рақснинг энг яхши анъаналарини акс эттирадиган ‘Андижон полкаси’ оҳанглари билан бутун авлодлар улғайган, одамларнинг хурсандчилик хотиралари шу рақс билан боғланган, ҳар бир хонадондаги тўй-ҳашамнинг энг авж нуқтаси шу шўх куй ва рақссиз ўтмайди.

Видеоселекторда ‘Андижон полкаси’ ҳар жиҳатдан жаҳон маданий мероси деб аташга лойиқ эканлиги, уни UNESCO номоддий маданий мерос рўйхатига киритиш бўйича таклиф бериш ташаббуси ўртага ташланди. Давлат раҳбари ушбу ташаббусни қўллаб-қувватлади», дейилади хабарда.

Аввалроқ Шуҳрат Абдураҳмонов раислигида ўтказилган ҳокимлик соатида «Андижон полкаси» куйи ва рақсининг юбилей ёши муносабати билан аҳолига топшириқ бергани хабар қилинганди.