Қашқадарё вилояти Нишон туманида тадбиркордан 5400 АҚШ доллари пора талаб қилган бош мутахассис ушланди. Бу ҳақда Иқтисодий жиноятларга қарши курашиш департаменти ахборот хизмати хабар берди.

Маълум бўлишича, Бош прокуратура ҳузуридаги департамент, ДХХ ва ИИБнинг вилоят бошқармалари томонидан тадбиркорлик субъектларининг ҳуқуқларини ҳимоя қилиш юзасидан тезкор тадбир ўтказилган. Унда Нишон тумани Халқ таълими бўлими махсус таъмирлаш экспулатация хизмати бош мутахассиси Ж.И. пора билан ушланган.

У тумандаги 2-сонли мактабнинг эски биносини бузиш учун бўлим мудири орқали ҳамкорлик шартномаси расмийлаштириб бериши эвазига «Қ.Т.» МЧЖ раҳбаридан 5400 доллар пора талаб қилган. Мазкур ҳолат юзасидан Жиноят кодексининг 210-моддаси (Пора олиш) билан жиноят иши қўзғатилиб, тергов ҳаракатлари ўтказилмоқда.

Аввалроқ Самарқандда тез ёрдам бўлими мудири фуқародан ишга киритиб қўйиши учун 500 доллар олган вақтида ушланганди.