Жамият - 15:16 · 27.04.2022

Ўзбекистонда 30 апрель куни умумхалқ хайрия ҳашари ўтказилади

Вазирлар Маҳкамасининг 26 апрель кунги фармойиши билан Ўзбекистон бўйлаб умумхалқ хайрия ҳашари ўтказилади. Бу ҳақда «Ҳуқуқий ахборот» хабар берди.

Фото: «Bugun.uz»

Қайд этилишича, фармойиш соғлом турмуш тарзини тарғиб қилиш, аҳолининг ижтимоий ҳимояга муҳтож қатламларини қўллаб-қувватлаш мақсадида қабул қилинган.

Фармойишга кўра, 30 апрель куни «Маҳалла ободлиги — юрт фаровонлиги» шиори остида ободонлаштириш ва кўкаламзорлаштириш умумхалқ хайрия ҳашари ўтказилади.

Эслатиб ўтамиз, Ўзбекистонда 2021 йилнинг 13 март куни бўлиб ўтган умумхалқ хайрия ҳашарида 3 мингдан зиёд кам таъминланган оиланинг 30 минг квадрат метр уй-жойи таъмирлангани ҳақида хабар берилганди.