Жамият - 13:10 · 27.04.2022

Ўзбекистонда вояга етмаганларга номақбул ҳаракат содир этганлик учун жавобгарлик кучайтирилади

Сенат раиси Танзила Норбоева бошчилигида хотин-қизлар ва болалар ҳуқуқларини ҳимоя қилиш, шунингдек, вояга етмаганларга нисбатан ножўя ҳаракатларни содир этганлик учун жавобгарликни янада кучайтириш масалаларига бағишланган мажлис бўлиб ўтди. Бу ҳақда Юқори палата матбуот хизмати «Bugun.uz»га хабар берди.

Фото: Сенат ахборот хизмати

Мажлисда Сенат аъзолари, Инсон ҳуқуқлари бўйича вакил (омбудсман) ўринбосари, вазирлик ва идоралар, нодавлат нотижорат ташкилотлари, оммавий ахборот воситалари вакиллари иштирок этган. Хотин-қизлар ва болалар ҳуқуқларини ҳимоя қилиш ҳамда вояга етмаганларга нисбатан номақбул ҳаракатларни содир этганлик учун жавобгарликни янада кучайтириш масалаларини ўрганиш бўйича Ишчи гуруҳ тузилган.

Унга ҳуқуқни қўллаш амалиётини таҳлил қилиш ва амалдаги норматив-ҳуқуқий ҳужжатларни хатловдан ўтказиш, халқаро тажрибани ўрганиш ҳамда хотин-қизлар ва болалар ҳуқуқларини ҳимоя қилиш соҳасидаги қонунчилик базасини такомиллаштириш бўйича таклифлар ишлаб чиқиш вазифалари юклатилган. Улар кейинчалик мамлакат парламенти томонидан кўриб чиқилади.

Аввалроқ Ўзбекистонда тадбиркорликни чекловчи айрим ҳаракатлар учун маъмурий жавобгарлик кучайтирилиши ҳақида хабар берилганди.