Қашқадарё вилояти Деҳқонобод туманида топилган қўнғир айиқ болаларидан бири ўлдирилгани ҳақидаги хабарлар рад этилди. Бу ҳақда Давлат экология қўмитаси матбуот хизмати раҳбари Бунёд Абдуллаев «Bugun.uz»га хабар қилди.

Маълум бўлишича, Қашқадарё вилояти Деҳқонобод туманининг тоғли ҳудудида «Қизил китоб»га киритилган қўнғир айиқлар яшаши аниқлангани, кейинроқ қўнғир айиқ боласи ўлдирилгани айтилганди. Давлат экология қўмитаси матбуот хизмати раҳбари Бунёд Абдуллаевнинг айтишича, топилган айиқлар ва ўлдирилган айиқ боласи иккита бошқа-бошқа ҳолат эканлиги аниқланган.

Хусусан, биринчи ҳолат Теракли маҳалласи ҳудудида аниқланган бўлиб, айиқ боласи ўлдирилган ҳолатга умуман алоқаси йўқ. Ҳозирда она айиқ ва унинг икки боласи тирик эканлиги маълум бўлди. Айиқ ва унинг болаларини суратга олган шахс Теракли маҳалласи яшовчи 22 ёшли Арслон Бўронов эканлиги аниқланган. У она айиқ ва унинг болаларини 22 апрель куни кечки пайт суратга олган.

Шунингдек, иккинчи айиқ жасади топилган ҳолат эса Деҳқонобод Давлат ўрмон хўжалигининг Қизилсой ўрмон бўлимида 5 апрель куни содир этилганлиги аниқланган.

Эслатиб ўтамиз, аввалроқ Ўзбекистонда 2022 йилда икки айиқни овлашга ажратилган квота бекор қилингани ҳақида хабар берилганди. Бундан ташқари, Экоқўмита раиси нима сабабдан «Қизил китоб»га киритилган айиқни овлашга рухсат бергани маълум бўлганди. Шунингдек, Ўзбекистонда ёввойи ҳайвонларни овлаш учун аризалар қабули қачон бошланиши айтилганди.