Ўзбекистон фахрийлари бошқа мамлакатлар билан солиштирганда нисбатан кўпроқ тўловлар олиши маълум қилинди. Бу ҳақда «Нигоҳ» хабар берди.

Маълум қилинишича, Хотира ва қадрлаш куни муносабати билан Иккинчи жаҳон уруши қатнашчилари, концлагерлар маҳбуслари ва Ленинград қамалида бўлган фуқаролар 15 миллион сўмдан (тахминан $1340) олади. Бу, Озарбайжон (882 доллардан кам), Беларусь (535 доллар), Қирғизистон (1209 доллар), Молдова (540 доллар), Россия (140–350 доллар), Тожикистонга (240–480 доллар) нисбатан юқори.

«Таъкидлаш жоизки, Ўзбекистонда тўловлар миқдори йилдан-йилга ошиб бормоқда: 2017 йил — 2 миллион, 2018 йил — 5 миллион, 2019 йил — 7,5 миллион, 2020 йил — 10 миллион, 2021 йил — 12 миллион», дейилади хабарда.

Аввалроқ Шавкат Мирзиёев пенсия ва нафақаларни 1 майдан 12 фоизга ошириш тўғрисида фармонни имзолагани хабар берилганди.  Йиғилишда кекса ёшдаги ҳамда эҳтиёжманд аҳолини моддий қўллаб-қувватлаш ишлари давом эттирилиши таъкидланди. Шунингдек:

• энг кам пенсия оладиган 725 минг нафар аҳолининг пенсияси 14 фоизга оширилади (440 минг сўмдан 500 минг сўмга);
• 9 май арафасида уруш қатнашчилари, концлагерлар маҳбуслари ва Ленинград қамалида бўлган фуқароларга 15 миллион сўмдан берилади.