Жамият, Қашқадарё - 12:01 · 29.04.2022

Қашқадарёда хотинининг кўзини ўйиб олиб, юрагига пичоқ санчиб ўлдирган эркакка ҳукм ўқилди — видео

Қашқадарё вилояти Яккабоғ туманида 2021 йил 21 октябрь куни хотини Г.Ҳ. билан жанжаллашиб, оғир тан жароҳати етказиб ўлдирган фуқаро У.Э.га нисбатан суд ҳукми ўқилди. Бу ҳақда вилоят Ички ишлар бошқармаси ахборот хизмати хабар берди.

Кадр: «Nasaf TV»

Маълум қилинишича, судланувчи У.Э.га Жиноят кодекси 97-моддаси 1-қисми билан 13 йил муддатга озодликдан маҳрум қилиш жазоси тайинланган.

«Залда ҳаммадан кечирим сўрайман, Президентимдан кечирим сўрайман биринчи ўринда. Мен бу уришимда ўлиб қолади, деб ўйламаганман. Бундай ниятим ҳам бўлмаган», — дейди эркак.

Эслатиб ўтамиз, Яккабоғ туманидаги Уйғур маҳалласида 21 октябрь куни фуқаро У.Э. маст ҳолатда турмуш ўртоғи Г.Ҳ. билан жанжаллашиб, уни бир неча бор уриб, тан жароҳати етказиб ўлдириб қўйгани ҳақида хабар берилганди.

Ҳодиса юзасидан Жиноят кодексининг 97-моддаси (қасддан одам ўлдириш) аломатлари билан иш очилган, гумонланувчи У.Э. қамоққа олинган. Бу ҳақда вилоят прокуратураси орадан бир ой ўтиб, 22 ноябрь куни — «Дарё» сўровидан сўнг ахборот берган.

Марҳуманинг отаси К.Ҳ.нинг сўзларига кўра, куёви «қизини ваҳшиёна тарзда уриб ўлдирган — бошига қаттиқ жисм билан уриб, бош суяклари ва бурнини синдирган, кўзини ўйиб олган, юрак қисмига пичоқ санчиб, қийнаб ўлдирган». Ота бу сўзларини тасдиқловчи сурат ва ҳужжатлари борлигини айтган.