Сирдарёда фуқарони ўқишга киритиб қўйиш учун 3,5 минг доллар сўраган талаба ушланди
Сирдарёда фуқарони Гулистон давлат университетига киритишни ваъда қилган талаба ушланди. Бу ҳақда Иқтисодий жиноятларга қарши курашиш департаменти ахборот хизмати хабар берди.
Маълум бўлишича, Бош прокуратура ҳузуридаги департамент ҳамда ДХХнинг Сирдарё вилояти бошқармалари томонидан тезкор тадбир ўтказилган. Аниқланишича, Гулистон давлат университети талабаси Д.Р. фуқаро Д.Б.ни юқори лавозимда ишловчи танишлари орқали ушбу университетга ўқишга киритиш қўйишни ваъда қилган. Талаба бунинг эвазига 3500 доллар талаб қилган, шундан 1500 долларни олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (Фирибгарлик) ва 211-моддаси (Пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ ДХХ хориждан ўқишни кўчириш учун қалбаки ҳужжат тайёрловчи жиноий гуруҳни қўлга олганди.
