Бухоро, Жамият - 12:40 · 01.05.2022

Бухорода аёл оилавий муаммолар сабаб ўзини дарахтга осмоқчи бўлди

Бухорода 30 апрель куни аёл оилавий муаммолар сабаб ўзини дарахтга осмоқчи бўлди. Бу ҳақда Миллий гвардия вилоят бўйича бошқармаси хабар берди.

Фото: Миллий гвардия Бухоро вилояти бўйича бошқармаси ахборот хизмати

Маълум қилинишича, шу куни соат тахминан 20:30 да Бухоро шаҳрида жойлашган «Сомонийлар истироҳат боғи»да жамоат тартибини сақлаш ва фуқаролар хавфсизлигини таъминлашга жалб қилинган Миллий гвардия Бухоро вилояти бўйича бошқармаси ҳарбий хизматчилари хизмат ўташ давомида истироҳат боғининг дарахтлар гавжум қисмида шивирлаган ҳамда одамнинг бўғиқ овозни эшитган.

Шундан сўнг зудлик билан дарахтлар томонга етиб борган ва катта дарахт шохида матолардан қўлбола усулда тайёрланган қизил рангли арқон ёрдамида ўз жонига суиқасд қилишга уринган аёлни дарахтда осиғлиқ ҳолатда, типирчилаётган вақтда қутқариб қолган.

Тез тиббий ёрдам кўрсатиш хизмати ҳамда шаҳар Ички ишлар бошқармаси навбатчилик қисми воқеа жойига етиб келгунига қадар Миллий гвардия ҳарбий хизматчилари томонидан аёлга биринчи тиббий ёрдам кўрсатилган. Жонига қасд қилмоқчи бўлган аёл Ғиждувон туманида туғилган, ҳозирда Вобкент туманида истиқомат қилиб, ушбу тумандаги ташкилотларнинг бирида ишловчи, икки нафар фарзанди бор 30 ёшли Г.Ў. бўлиб чиққан.

Дастлабки маълумотларга кўра, аёл турмушидан ажрашган ва бир неча ой аввал эри билан жанжаллашиб қолиб, шундан сўнг ўз жонига қасд қилишга уринган. Айни пайтда Г.Ў.нинг аҳволи қониқарли ҳамда ҳодиса юзасидан дастлабки суриштирув ҳаракатлари олиб борилмоқда.

Аввалроқ Қорақалпоғистоннинг Қўнғирот туманида 21 июль куни профилактика инспектори ўзини кўприкдан ташламоқчи бўлган 18 ёшли йигитни қутқариб қолганди. Шунингдек,

Фарғонада аёл жонига қасд қилиш мақсадида ўзини поезд тагига ташлагани, Россияда ўзбекистонлик 13 ёшли бола ўз жонига қасд қилгани ва Самарқандда аёл ўзини учинчи қаватдан ташлашга урингани хабар қилинган.