Жамият, Қорақалпоғистон - 13:59 · 06.05.2022

Орол бўйидаги Техно: Мўйноқда электрон мусиқа «Стихия» фестивали ўтказилади

Мўйноқдаги кемалар қабристонида 2022 йил 6–8 май кунлари «Стихия» электрон мусиқа, санъат ва фан фестивали бўлиб ўтади. Лойиҳа 2017 йилда Мўйноқ шаҳрида Орол денгизининг экологик ҳалокатидан хабардорликни ошириш ва минтақанинг барқарор ривожланишига кўмаклашиш, шунингдек, Ўзбекистонда яшовчи халқларни бутун дунёга танитиш мақсадида ишлаб чиқилган.

Фото: Туризм ва маданий мерос вазирлиги ахборот хизмати

Бугунги кунда Орол фожеаси бутун Марказий Осиё минтақасидаги энг кескин экологик муаммо бўлиб қолмоқда. Президент Шавкат Мирзиёев БМТ Бош Ассамблеясининг 72-сессиясидаги нутқида жаҳон ҳамжамиятини ушбу табиий офатга эътибор қаратишга ва бу борада саъй-ҳаракатларни бирлаштиришга чақирган эди.

Бугунги кунда «Стихия» бутун дунёдан мусиқачилар, DJ’лар, продюсерлар, рассомлар ва олимлар иштирокидаги бир нечта лойиҳаларнинг аралашмасига айланди. Уларнинг барчасини ер юзидаги ўзига хос масканда диққатга сазовор жой яратиш мақсади бирлаштиради.

Бу йилги фестивал учун учта алоҳида-алоҳида саҳна яратилади: электрон, прогрессив ва этник. Унда Ўзбекистон, Туркия, Россия, Германия, Грузия, Ҳиндистон, Эрон, Қозоғистон, Қирғизистон, Нидерландия, Украина, Франция, Швеция ва Япониядан 30 га яқин машҳур джълар иштирок этиши кутилмоқда.

Фестивал ўзида «Стихия Ген лойиҳалари», «Форум Стихия Н+1», «6 миллиард дарахт» ва турли ижтимоий ташаббусларни қамраб олади. Лойиҳалар ва фестивал дастури ҳақида батафсил маълумотлар тез кунларда маълум қилинади.

Фестивалга чиптани www.stihia.org сайтидан харид қилишингиз мумкин.

Маълумот ўрнида, Мўйноқдаги кемалар қабристонида 6–8 май кунлари ўтказиладиган «Стихия» ва 7–8 май кунлари Бойсунда ўтказиладиган «Бойсун баҳори» фестиваллари учун қўшимча авиапарвозлар йўлга қўйилмоқда. Бу қатновлар 2022 йилдан бошлаб амалга оширилмоқда, ҳозирга қадар фестиваллар учун қўшимча қатновлар белгиланмаганди.