Навоийда ичида йўловчилари бўлган автобус ағдарилиб кетди — видео

Навоий вилояти Қизилтепа туманида 3 май куни йўловчи автобуси ағдарилиб кетди. Йўл ҳаракати хавфсизлиги хизмати ҳолат юзасидан маълумот берди.

Қайд этилишича, соат 10:00 да туман ҳудудидан ўтувчи 4Р-65 автомобил йўлининг 23–24-километрлари оралиғида ҳайдовчи К.Ў. «Yutong» автобусида ҳаракатланаётиб, эҳтиётcизлиги оқибатида рул бошқарувини йўқотган.

Шундан сўнг автобус йўл четига ағдарилган. Йўл-транспорт ҳодисаси оқибатида 5 нафар йўловчи тан жароҳати билан шифохонага ётқизилган.

ЙТҲ юзасидан Навоий вилояти ИИБ ҳузуридаги тергов бўлими томонидан Жиноят кодексининг 266-моддаси 1-қисми билан жиноят иши қўзғатилиб, дастлабки тергов ҳаракатлари олиб борилмоқда.

Эслатиб ўтамиз, Тошкент вилояти Оҳангарон тумани ҳудудидан ўтган А-373 автомобил йўлида 3 апрель куни юк машинаси ва тиркамаси ағдарилгани ҳақида хабар берилганди.

“Bugun.uz” янгиликларини “Telegram”да кузатиб боринг