Туркманистон президенти Сердар Бердимуҳамедов Умра (кичик Ҳаж) маросимини адо этиш учун Саудия Арабистонига икки кунлик ташрифини бошлади, дея хабар бермоқда ТДХ давлат ахборот агентлиги.

Таъкидланишича, бу давлат раҳбарининг Туркманистон президенти лавозимига киришганидан кейинги илк хорижий ташрифидир. Уни отаси, Халқ маслаҳати миллий кенгаши раиси Гурбангули Бердимуҳамедов, парламент раиси, мамлакат бош вазирлари ўринбосарлари ва муфтийлар кузатиб қўйган.

Қайд этилишича, Туркманистон кексалари Президент билан бирга Саудия Арабистонига борган. Жидда аэропортида давлат раҳбарини Макка вилояти губернатори ва Саудия Арабистони қироли маслаҳатчиси Холид бин Файсал Ол Сауд кутиб олган. Саудия Арабистонининг SPA ахборот агентлиги чоп этган суратларга қараганда, Сердар Бердимуҳамедовга сафарда ўғли Керимгули ҳамроҳлик қилган.

Аввалроқ Туркманистонда ўқитувчилар дарсда Сердар Бердимуҳамедов ютуқлари ҳақида гапиришга мажбур қилинганди.