АҚШ президенти Жо Байден мамлакатда электр энергияси ишлаб чиқариш қувватларининг тақчиллиги сабабли фавқулодда ҳолат эълон қилди. Бу ҳақда Оқ уй матбуот хизмати хабар берди.

Президент Осиёдан қуёш панеллари импорти учун бож тўлашдан озод қилиш муддатини узайтирган. Оқ уй баёнотида айтилишича, АҚШнинг кутилаётган истеъмол талабини қондириш учун етарлича электр энергияси ишлаб чиқариш қобилиятига таҳдид солувчи «кўп омиллар» мавжуд.

«Мен, кичик Жозеф Робинетт Байден, Америка Қўшма Штатлари президенти, мамлакат конституцияси ва қонунларига берилган ваколат остида истеъмолчилар талабини қондириш учун етарли электр энергияси ишлаб чиқариш қувватида мавжуд таҳдид туфайли фавқулодда ҳолат эълон қиламан», дейилади баёнотда.

Байден, шунингдек, Камбоджа, Малайзия, Таиланд ва Вьетнамнинг «айрим қуёш батареялари»ни икки йилга импорт божларидан озод қилган.

Аввалроқ Венгрияда Украинадаги уруш сабабли фавқулодда ҳолат эълон қилинганди. Шунингдек, АҚШ мамлакатдаги энг катта бензин етказувчи компанияга қилинган киберҳужум сабаб фавқулодда ҳолат жорий қилган.