Жамият - 14:33 · 10.06.2022

Ўзбекистонда муқобил энергия ускунасини ўрнатганларни қўллаб-қувватлашнинг янги тизими жорий этилади

Шавкат Мирзиёев 10 июнь куни қайта тикланувчи энергиядан фойдаланишни кенгайтириш бўйича устувор вазифаларга бағишланган йиғилиш бошлагани хабар қилинганди. Президент ушбу масала умуммиллий аҳамиятга эгалигини қайд этиб, муқобил энергия ускунасини ўрнатган аҳоли ва тадбиркорларни қўллаб-қувватлаш бўйича мутлақо янги тизим жорий этилишини таъкидлади.

Фото: «Ҳудудгаз Тошкент шаҳар» МЧЖ матбуот хизмати

Таъкидланишича, бунда аҳоли ва тадбиркорларга:

  • ўрнатилган қуёш ва шамол электр ускуналари учун қувватига қараб 15 миллион сўмгача, сув иситиш қурилмаси учун эса 2 миллион сўмгача компенсация тўланади;
  • ёки ускуна қийматини 3 йил ичида фоизсиз бўлиб-бўлиб тўлаш имконияти яратилади.

Ушбу тизим Энергетика вазирлигининг махсус жамғармаси орқали жорий этилиши белгиланди.

Муқобил энергия ускуналарини ўрнатиш истагида бўлган аҳоли ва тадбиркорлар бу имкониятлардан фойдаланиши учун бирон-бир идорага боришга мажбур бўлмайди. Барча ҳужжатлар ускуна харид қилинадиган жойнинг ўзида ҳал бўлади.

Бунинг учун:

  • жамғарма маҳаллий ишлаб чиқарувчилар ҳамда ҳудудлардаги сотувчилар билан ҳамкорлик шартномаларини тузади;
  • ишлаб чиқарувчиларнинг аҳоли ва тадбиркорларга ускуналарни бўлиб-бўлиб тўлашга бериш харажатлари жамғарма томонидан қоплаб берилади;
  • жамғармага 100 миллиард сўм ажратилади, ишлатишига қараб йил якунига қадар яна 100 миллиард сўм берилади;
  • жамғарманинг электрон портали ишга туширилиб, барча жараёнлар тўлиқ рақамлаштирилади.

Мутасаддиларга тизимни 1 сентябрдан амалиётга жорий қилиш топширилди. Вилоят ҳокимлари олдига 2022 йилда «дафтарлар»га кирган камида 5 мингта оилани, 2023 йилда яна 10 мингтасини сув иситиш қурилмаси билан таъминлаш чораларини кўриш вазифаси қўйилди.

Аввалроқ Навоийда энергия соҳасида кадрлар тайёрлаш маркази ишга туширилиши хабар қилинганди.

Bugun — LIVE