Жамият, Жиззах - 19:50 · 11.06.2022

Жиззахнинг Зомин туманига сел келди — видео

Жиззах вилояти Зомин туманининг айрим ҳудудларида 11 июнь куни сел кузатилди. Бу ҳақда вилоят Фавқулодда вазиятлар бошқармаси хабар берди.

Фото: Жиззах вилояти Фавқулодда вазиятлар бошқармаси

Қайд этилишича, 11 июнь куни Зомин туманининг Дуоба ҚФЙда қисқа муддатли кучли ёғингарчилик оқибатида сел оқимлари кузатилган. Усмонлисой, Сувлисой ва Саркамар қишлоқларидан ўтган ариқ сувлари тошиб, ёндош ҳудудда жойлашган айрим аҳоли яшаш уйларининг ҳовлисига, экин майдонларига сув кирган.

Мазкур вазият бўйича зудлик билан вилоят Фавқулодда вазиятлар бошқармаси раҳбарияти ва қутқарув бўлинмалари ҳодиса жойига етиб борган.

Ҳозирда қутқарувчилар томонидан сув оқимларини хавфсиз ўтказиб юборилишини таъминлаш бўйича барча зарур чора-тадбирлар ўтказилмоқда. Вазият тўлиқ назорат остига олинган. Ҳодиса оқибатида жабрланганлар йўқ.

Аввалроқ «Ўзгидромет» хизмати 10–11 июнь кунлари кутилаётган кучли ёмғирлар ёғиши сабабли республиканинг тоғолди ва тоғли ҳудудларида сел келишидан огоҳлантирганди. Унда, хусусан, Жиззахнинг Зомин ҳудуди аҳоли ҳам огоҳ этилган.

Bugun — LIVE