Наманган вилояти Косонсой туманида жойлашган «Ертикан» сув омборида 13 июнь куни сув сизиб чиқиши ҳолати кузатилди. Фавқулодда вазиятлар вазирлиги бу бўйича маълумот берди.

Унга кўра, туманнинг Қуқунбой қишлоғида жойлашган «Ертикан» сув омборида сув сизиб чиқиши (фильтрация) ҳолати бўйича бирламчи маълумот 14 июнь куни соат 10:35 да вилоят Фавқулодда вазиятлар бошқармасига келиб тушган.

Юқоридаги ҳолатни бартараф этиш мақсадида вилоят ФВБга тегишли ташкилот масъул ходимлари билан биргаликда сув омборига бориб вазият ўрганилган. «Ертикан» сув омборининг 2 та ерли жойидан (5 ва 10 литр секундига) сув сизиб чиқиши 13 июнь куни соат 19:00 дан бошлангани, дамба (темир бетон)нинг ўзи мустаҳкамлиги, аҳолига ва тўғонга хавф йўқлиги аниқланган.

Сув сизиб чиқишини бартараф этиш мақсадида «Косонсой» сув омборидан сувни чиқариш тўхтатилган, «Ертикан» сув омборидан сувнинг чиқарилиши «Калбува» ва «Муса ариқ» каналлари (авариявий ташлама) орқали 4 метр куб/секундгача оширилган.

Ҳозирда ушбу сув омборида вазиятни кузатиб бориш ва ишларни назорат қилиш мақсадида вилоят Сув омборлардан фойдаланиш бошқармаси ва тегишли мутахассислардан иборат кузатув пости ташкил этилган, вазият назорат қилиб борилмоқда.

Аввалроқ Намангандаги Варзик сув омборида балиқлар номаълум сабабга кўра нобуд бўлгани айтилганди. Шунингдек, Наманганда 43 йиллик Эскиер сув омбори қуриб бораётгани маълум бўлган.