Жаҳон - 23:50 · 14.06.2022

Украинага қайтарилган марҳумлар жасади, Путин билан бўлажак музокаралар ҳақида яна гапирган Зеленский ва Украина–ЕИ келишуви

Россия қўшинларининг Украина ҳудудларига бостириб кириши ортидан бошланган уруш 24 февралдан буён давом этмоқда. Қуйида 14 июнь куни содир бўлган можарога алоқадор асосий янгиликларни тақдим этамиз.

Фото: «Associated Press»

Зеленский Путин билан бўлажак музокараларга изоҳ берди: «Мен тайёрман»

Украина президенти Владимир Зеленский Россия президенти Владимир Путин билан музокараларга тайёр эканини яна бир бор таъкидлади. Давлат раҳбари матбуот хизматининг хабар беришича, бу ҳақда у Данияда ОАВ вакиллари учун ташкил этилган онлайн матбуот анжумани чоғида айтиб ўтди.

Унинг сўзларига кўра, бугунги кунда Россия армияси тўхтатиши ёки бундай бўлмаслигини фақат Россия президенти ҳал қилади.

«Агар Россия урушни тўхтатмоқчи бўлса, музокара столига ўтириши керак. Украина бўйича музокаралар столининг Украинасиз бўлиши мумкин эмас. Шунинг учун бу музокаралар тўғридан-тўғри бўлиши лозим. Агар Россия урушни тугатишга ва ҳудудимизни тарк этишга тайёр бўлса, мен шахсан ҳар қандай вақтда учрашишга тайёрман», — дейди Зеленский.

АҚШ Польшада Украина донини сақлаш учун вақтинчалик омборлар қуради

АҚШ президенти Жо Байденнинг айтишича, Қўшма Штатлар Польшада Украина билан чегарадоош ҳудуда дон омборлари қуришни режалаштирмоқда. Президентнинг айтишича, ҳозирда у Украинадан 20 миллион тонна буғдойни жаҳон бозорларига чиқариш учун европалик ҳамкорлар билан яқиндан ҳамкорлик қилмоқда.

Жо Байденнинг тушунтиришича, Украинадаги темир йўл Европаникидан кенгроқ, шунинг учун Украина ғалласини Европага етказишда қийинчиликлар юзага келмоқда. «Биз Украина билан чегарада, Польшада вақтинчалик дон омборларини қурмоқчимиз», — дейди давлат раҳбари.

Украина ва Европа Иттифоқи автомобиль транспортини либераллаштириш бўйича келишиб олди

Еврокомиссия Украина–Европа Иттифоқи автомобиль транспортини либераллаштириш бўйича махсус келишувнинг якуний матнини келишиб олди. Бу ҳақда Украина инфратузилма вазирлиги матбуот хизмати хабар берди.

Қайд этилишича, келишув матни рухсатномаларни доимий равишда олиш заруратини бекор қилишни назарда тутади ва Украина маҳсулотларини автомобиль назорат пунктлари орқали экспорт қилишни тўхтатиб қўймайди. Ҳужжатни имзолаш июнь ойининг охирига режалаштирилган.

Россия президенти ёрдамчиси Юрий Ушаков: «Россия ва Украина ўртасидаги музокараларда ҳамма нарса тўхтаб қолди»

Россия президенти ёрдамчиси Юрий Ушаков Россия ва Украина ўртасидаги музокара жараёнининг бориши ҳақида гапирди. Унинг сўзларига кўра, делегациялар ўртасидаги сўнгги тўлақонли алоқа 15 апрель куни бўлиб ўтган, ўшанда битимнинг «тайёр лойиҳаси» Украина делегациясига топширилган ва шундан сўнг «ҳаммаси тўхтаб қолган».

«15 апрель куни бизнинг якунланган лойиҳамиз топширилди, у ҳозирда охиргиси бўлиб қолди, чунки шундан сўнг ҳеч қандай муносабат билдирилмади», — дейди Ушаков.

Украина «Азовсталь»нинг яна 64 нафар марҳум ҳимоячисининг жасадларини қайтариб олди

Россия билан алмашиш доирасида мамлакат Украинага яна 64 нафар «Азовсталь» ҳимоячисининг жасадларини қайтариб берди. Бу ҳақда «УНИАН» хабар берди.

Хусусан, Запороже вилоятида ҳалок бўлган ҳарбий хизматчиларнинг жасадларини алмаштириш бўйича навбатдаги операция ўтказилган. «Украина ‘Азовсталь’нинг 64 нафар қаҳрамон ҳимоячисининг жасадларини муносиб дафн этиш учун қайтарди», дейилади хабарда.

Bugun — LIVE