Британиянинг бозор тадқиқоти компанияси бўлган Kantar дунёдаги энг қиммат 100 та глобал брендлар рейтингини эълон қилди. Бу ҳақда «Bloomberg» хабар берди.

Рейтингга кўра, биринчи ўринни 947,1 миллиард долларга баҳоланган Apple бренди олган. Бу кўрсаткич 2021 йилга нисбатан 55 фоизга кўп. Охирги марта Apple ушбу рейтингнинг биринчи қаторини 2015 йилда эгаллаган, кейинги йиллар биринчиликни Amazon қўлга киритганди.
Шунингдек, қуйидаги компаниялар юқори бешталикдан ўрин олган:

• Google, қиймати бир йил ичида 78 фоизга ўсган ва 820 миллиард долларга яқинлашган;
• Amazon’нинг қиймати атиги 3 фоизга ўсиб, 706 миллиард долларга етган;
• Microsoft тўртинчи ўринни сақлаб қолган. Бренд 49 фоизга қимматлашиб, 611 миллиард долларгача кўтарилган;
• Tencent ҳам бешинчи ўринда қолган, бренд 11 фоизга арзонлашган ва 214 миллиард долларга баҳоланган.

Топ 10 таликка McDonald’s, Visa, Facebook, Alibaba ва Louis Vuitton кирган. Йил давомида 100 таликка кирган барча брендларнинг умумий қиймати 23 фоизга ўсиб, қарийб 8,7 триллион долларни ташкил қилган.

Аввалроқ Facebook, Google ва Apple Ўзбекистонга 9 ойда қанча солиқ тўлагани маълум бўлганди. Шунингдек, Apple’ни савдода ортда қолдирган компания номи айтилган.