Ўзбекистон Туризм ва маданий мерос вазирлиги ҳамда Қозоғистоннинг Туркистон вилояти ҳокимлиги томонидан 17–18 июнь кунлари журналист ва блогерлар учун инфо-тур ташкил қилинди. Турнинг иккинчи куни доирасида «Bugun.uz» мухбири туристик зоналардан фоторепортаж тайёрлади.

Инфо-турнинг иккинчи кунида ОАВ вакиллари тарихий Сауран қалъасида бўлди. Маълум қилинишича, ушбу шаҳарча XII–XVI асрларда бунёд этилган. Айни пайтда ҳудудда қўрғон қолдиқлари сақланиб қолган.

Сауран қалъаси кираверишида махсус ўтов ташкил этилиб, тур иштирокчилари қимрон ва бошқа маҳаллий таомлар билан меҳмон қилинди.

Шундан сўнг Қарноқ қишлоғи чеккасидаги қабристон ҳамда муқаддас «Имом Балхий» масканига борилди. Маҳаллий аҳоли у ердаги қадимий тутни «Мажратут» деб атайди. Дарахт тахминан 1000 ёшда.

Шу билан бирга, Халфа қабристони зиёрат қилиниб, у ерда янги қурилган масжид ва мадраса фаолияти билан танишилди.

Пресс-тур қатнашчилари, шунингдек, Кентау шаҳарчасидаги Ёшлар боғида бўлди. У ерда қозоқ миллий куйлари ижро этилиб, ёш гимнастикачи қизларнинг чиқишлари намойиш қилинди.

Маълумот учун, Ўзбекистон–Қозоғистон чегарасидан Туркистон вилоятигача масофа 250 километр атрофида бўлиб, мини автобусда 3,5–4 соатлик йўл босилади.