Жаҳон - 19:42 · 23.06.2022

Хитой раиси Украинадаги урушга муносабат билдирди

Хитой раиси Си Цзиньпин Украинадаги уруш инсоният учун огоҳлантириш бўлганини маълум қилди. Бу ҳақда «ABC News» хабар берди.

Фото: «The Daily Beast»

Пекин Москванинг 24 февраль куни Украинага бостириб киришини қораламаган ва Украина билан муносабатларини сақлаб қолишга интилаётган бўлса ҳам, Ғарбнинг Россияга қўйган санкцияларини танқид қилган.

«Украина инқирози яна инсоният учун сигнал берди. Агар давлатлар ўз кучларига кўр-кўрона ишонса, ҳарбий иттифоқларни кенгайтирса ва ўз хавфсизлигини бошқалар ҳисобига қидирса, албатта, хавфсизлик билан боғлиқ қийинчиликларга дуч келади», — деган Си Цзиньпин.

Бразилия, Ҳиндистон ва Жанубий Африка ҳам Москвани Украинага бостириб киришини очиқдан-очиқ қораламаган. Хитой раиси санкцияларни «бумеранг ва икки қиррали қилич» деб таърифлаган. Бу «ўзининг ва бошқаларнинг манфаатларига зарар етказиш» эканини қайд этган.

Эслатиб ўтамиз, аввалроқ Хитой Украинадаги урушни тўхтатиш йўлини маълум қилганди. Шунингдек, Хитой раиси АҚШ, Россия ва NATO’га мурожаат қилганди.

Bugun — LIVE