NATO бош котиби Россия билан муносабатларга ойдинлик киритди
NATO бош котиби Йенс Столтенберг альянс ва Россия ўртасидаги муносабатларга ойдинлик киритди. Бу ҳақда «El Pais» хабар берди.
Столтенбергнинг сўзларига кўра, альянс Россияга қарши уруш олиб бормаяпти, лекин Украинага ёрдам беришни давом этмоқда. Расмий давлатлар ўртасидаги қуролли можарони дипломатия йўли билан тўхтатишни таклиф қилган. NATO Украинанинг суверен ва мустақил Европа давлати бўлиб қолиши учун унинг позициясини мустаҳкамлаш ниятидалиги қайд этилган.
«Биз Украинага ёрдам берамиз. NATO ва Россия ўртасида ҳеч қандай уруш йўқ. Аммо тичликни борича қабул қилиш ҳар доим таҳликали», — дейди у.
Столтенберг 28–30 июнь кунлари Мадридда ўтказилиши режалаштирилган NATO саммитининг аҳамияти ҳақида ҳам гапирган. У тадбирда иштирокчи давлатлар қўшинлар сонини кўпайтириш бўйича келишишини айтган.
Шунингдек, йирик ҳажмда ҳарбий техникадан фойдаланиб, тезкорлик билан жавоб бериш муҳокама қилиниши таъкидланган. Бундан ташқари, улар Украинага катта ёрдам пакетини тасдиқлаши керак.
«Бу тарихий воқеа бўлади, авваланбор, 30 иттифоқчи Европада Иккинчи Жаҳон уруши тугаганидан бери энг катта хавфсизлик инқирози фонида йиғилмоқда. Албатта, диққат Россия ва Украинага қаратилади. Лекин бошқа таҳдидларни, жумладан, Шимолий Африка ва Саҳелдаги терроризм ёки беқарорликни унутмаслик керак. Шунинг учун жанубий мамлакатлар билан ҳамкорликни кучайтирамиз ва келишиб оламиз», — деган NATO бош котиби.
Эслатиб ўтамиз, аввалроқ Сергей Лавров Европа Иттифоқи ва NATO Россияга қарши коалиция тузаётганини айтганди. Россия дипломати вазиятни Иккинчи жаҳон уруши билан таққослаганди. Шунингдек, NATO’нинг Украина бўйича режаларидан бири маълум қилинган.
